Aya:dé amik takkotpé ikang
PK Payeng
Lakhimpur
“Ma:mo ka:toka télé kapé yirla luposuna du:ji” amodém taddopé Rajubí CCTV kemera:lok rugabnam Sargom GPS dok lenné moyima:dém Dipanjali mé léngkanto. Ka:toném Bebibí Nébíng ko:nédém yirra luposuna dung. Rajuké dépé ka:ronam séudém amodé mé:lík suma:la luto”tani:ko yirra sinéi luposulama:n”. Yigodé ayi:sula íbímla dungkang.
Bebibí sí:bugdannai amilo gípakka. Sísa:né mímbír bírmanla so:mandopé bojeko ayiréméi pa:toma.Bíkké lí:yug lí:yugoula pérog apí rokpídémpin miyumdém kapiné ya:medéi mitpanyen ? Ajjaoko koyemoula yirla luposunamdém mé:nyokla:ma:la édílo lékoda luposubekya:kun édémpé sí:sang ya:meé mé:dungai. Ro:dí-yumdípé ya:me: sí:sangko gímíntíkangai édé Raju émnam ya:medé. Asin tolikla kablík kaba:sula binam ayangém boríksuto lédu-lamku bojeko méngkin suma:ne Bebibí. Ayangém bimínsula do:ying do:mo kínamo:dé asiném kimokang ,dépila érang ami kamango:pé annyidé dukpakbosukang.
Duktad gíné tani:kídardé gíadodo anédé kaplíksula lurobkang “ngok omédé atíkosinéi okum bomdopé kinmangada,gíkang kapiyén,luyin-lujo:sula du:bodopé ,dí:jok-tékjokma:pé ayang abola yebodopé lubila:bo.” Lukampéi dítag angngokopé ayang abola írangém du:bosula ommangém annyiko pa:to.Néng omé kola milbong aoko.
Édémyang bojeko aipé du:píla:ma:la do:lu:dok mo:téng gampé du:né sariali:lo anupé Pharmacy khulila Doctor émgom du:moka.Dépé ila RCC okumém sesa:to.Gariémgom réto.Bebibí gari:dém aídéi etbom sudungai. Édémpina anyidé lang yígnédé kangkidungai. Do:lungo:lo gíyekumílo bírodém luhu-luba:la ge:mínsumodungai.Dépila kéíg kéíkpé bínnyé amik takotpé ka:mín sukang.Édé agomdém ané-abudém lubisutoném “íra:lo lékoném imínéi sudakbo:néna,mé:yinsula du:pé mílo aido”, abudé lukang. Ro:dí-yumdípé milo:dé lukín lumín namlok garisogéi dukkesula sipébong émna botté bottépé jé:yonla mar maraila ka:ríksula:ma:dopé mikyablo dé:batla gíkang.Kangkinné kídaré ka:la yallo gíkang.Lo:ying ledudo omé-aodé jénggo kabgo:la anédok bíbélélla daknamdém ka:mitla:ma:la katok- yoktung okokoi típa:sun pa:ton odogéi okgab sunané gaséngdém jokkin lígdodo omíksula amo:lo otokkang.
Omédé ané attídém phone ila lubingabto jin-go jin-gola. Éi isora émna pisu pimula ané attídé gari:dém la:lenmoge:la milo:dém gíbokang. Gari:do du:la appíng aípénam tani:kídarém lubingapto.Gípí:la ka:namé tani:dé loritokuma:bo.Idogom Embulence goglíkla Dibrugarh Medical College Hospitello písa:bola léngkantoném aiman yogmo aíéi dosutonyéya amméi bitonéya.Su:lopé kinpí:la:tomang,
