history_edu
Poetry
Mé:tom
*NA:N*
______
Mg. Monturam Taíd
_( Lakhimpur )_
Na:n no mé:padakkun nok ísíng takkolo
Lékor sigla sigla nok lédulo gímínnamdém
Na:n nok apin dola du:dagdo
Aíké aramdo senebettak ongo yumnamdé
Du:daggom nokkélok ajjok bi émna
Konamdém mé:padakkun.
A:m gatkurnam lédupésin a:mdé
Lékoda badlendakku
Bétuém bukumna samna yigdag lédupé:sin
Bétudé lékoda sa:la appuné pundakku
Na:na piyagdok asugdo so:yungké
Apí umnamdé anu agommang
No appíngém kinge:la kapila mé:dírdun.
Rokom pé kikirik kogdodo darabla
Ímí mutsabila síkírdodo ingamonédé
Na:n no
Ramyémílo kumsunglok a:mdém jo:léngéla
Ki:pardo íkodnam ambíndém
Apin-pé adla domonédé na:n no
Aríg gíté:la a:nélok ongodém nérbomdanna
Tubbomgékula ba:la dobonédé na:n no
Yumdém ayir a:yemílo
Eyeg,Porog,Péjam mosinggé:la ímí kama:mílo
Amik éra:lok ímí métung asongko kola
Apin oying ké:la dobonédésin na:níno
Odok lédupésin na:n no aimang
Émnai no mé:dírla kabla du:n.
Na:na no kindagman okumdo kapila
Yabgodé du:dagji
Lo:dípé samgé:la gínam ko:badémsin
Sé réngamsé takkége:la ísí:pé parpagnam
Agomdém na:na no kindagman.
Na:na sé réngamsé mo:písémei aíkém-pé Mésumang
Émpigé:la mo:písémyang aí ya:né okko du:n ?
Na:na no aila du:molang mo:písok
Arang ara:bok aipé mé:mínsunamsém
Aipé mé:mínsunamsém.
_________*****_________