history_edu Poetry

Mé:tom

Karsang takar

Aríg ara:lok gejígné ali: anggoém samtídla gídodo,

ané-abu kama:né ésaré yerung kéra:lo gía:la ludag—

mé:tom légangé sipé turpé ila kapil dun?

Do:mír ya:riyé a:mílo,

pédongé odo:do,

Aglíng sa:né ésaré ísíng léppírém unsa:mílo

Opanné mitomlokké aríg amliyé simílo—

Kinsudag mé:dír mé:tomé okum gí:da:lo arí kama:né appunpé.

Mé:tomé kéno:lo apin kosakko bimang,

Du:ra:sumomang írang kama:né péttangémpiné mitomém.

Mé:tomé kinbimang banggén kama:né gínggo:né tani:lok agomém?

Bí kinmang jelablok murkong kama:né do:yingém.

Tani éla: adíé angula gídag lo:dísém,

adí adílo aíké dumsig migmodém pídyubsudag,

Émpige:la:sin ajjoudokké atsasunam mé:tomdé—

mé:polang mé:dír ara:ngí:lo gítínsula du:pakkang.

Gíné pu:mulo ko:pagnam kareng ali agomém su:losin gíladbodakku kublenma:nam mé:tomé,

Okum bangku:lo mé:tomém mésí:la lé:pé idodo,

Ayango:la lé:síla aipé mé:dodo mé:beksumodag—–

Ngok adnam mé:tomsé lekelokkémpé arré katokuma:bo.

Édílai édíla ngo aíém tausudo–

Mé:tom kosag légangé kapila do:ré:né amo:sémsin dé:bur modun?

Adí lékudokké Gínmur ésaré pédong bírdug goglígla pédongé angkumílo,

do:ré:né amo:lo ngok ba:bubí alé alaglo su:yung yolsudag.

Ommang kané né:ngpé Mé:tomsém aík akiso gébompé mé:dodo,

Lagbomné ommarpé usa:pé émna mé:dodo—–

Ola:manam mé:tomé odok arrém biyekulang?

Mé:tomé mé:beksumodak sunkenlok ila:ma:nam gérgéng kama:né ya:melok ngasodém,

Mé:tomé kíla lé:dak ayang rokpanmoné leke ayang sikurém.

Written By Karsang Takar

Published On 05 September 2026

visibility

Total Views 15