Nébíngkolokké pirnyouko

     Ngo mé:tomém addo. Ngo éddíko mé:tomém adjo:daksong,ngok adnamdé mé:tompé idaksong ima:song kinma  émdaggom mé:tom émna addo. Ngo mé:pol du:yém mé:po mé:tomém odokké mé:díryémílo mé:dír mé:tomém addo. Pétta-péiyíng,asi-sikur,abung,a:né,pa:tang,ísíng-ílíng sé mo:píso ngok amikso bérté:do bérbeksunam appí:dém ka:la mé:tomém addo. Ngo amik adnam mé:tomém porido.kinnélokké ko:ka:lo:pé takamké mé:tomém porido. Ngom sé:kai luyirnamkosin lagima luyumnamkosin lagima.

        Akke taniyé ludag bík mé:tomdé aidag,bík mé:tomé aima. Ngo sé:koké mé:tomémsin aima émna luma. Ngok mé:tom adnamdé aipé aidag émna mé:la ngo adma,adlí:la:pakko addo. Ané agomsém jarmonam légangé,ngok asin mé:namsém atsarsunam légangé addo.Abayang sí:sang mitomé 'social media' lo mé:tomém addag. Édé mé:tom kídí:dém ka:la akke lure:luse:la lunné dung. 'Social media'lok mé:tomé jaboré. Ager Kamal addag. Édé mé:tomkídí:dokké arré kama. Éddíko 'social media' lo mé:tom odokké atí atí gomlab adyirsudu:ji bulum ngo asin ara:bokki ménggésudung odokké ayangém bidung. Siyum-sí:roké adíso éddíko sí:san ko:-ko:néngé aiman agerém gerla adísém aima:b imodung,ri:l,vlog mola aíém Aiman imodun ? Ané-abu,réngam yébung-yerungém gaddun ?

         Aidag aimanggom aíké mé:namdém mé:tompé adla manggom gomlab adyirsunédé réngam-sokképé ainé taniyé. Bulum luyirko lula,luyumla attíla du:momílo longéko kínggí:pé ainé mé:tomém adyé. Bulum édílosin lure:-luse:la lupé lagima. Mé:tomdé kapéi idaggom édé aima:n agerma.ri:l bonaila,daba, resturent, risort lo gíla apo: tínggo:namdém-péyam gasumko adya:dag.

        Aidag aimanggom mé:tomko adnédé aíképé,réngamképé aidag. Aiman ager gerla adí gípagmonam-démyam mé:tomko adla bík asin agomdém lusarsunamdé aidag. Pagmílo potinpé la:lenna lé:mílo bík mé:namdém lédumokutsuné réngamé ka:pa:yéku manggom pagmanggom mé:tomdém adla lé:mílo édílai sé:koi ka:beksula poriyé. Siyum-sí:ro 'social media Facebook, WhatsApp group lo bojérungko taniyé poridag.

       Léddarpé takamém mé:tomém adlangka émna kumpa:dung. Mé:tomém ai-kampopé atpé mé:yém amiké mé:tomém porilang. Sé:kai,aidag,aimang émna lupagnamdé bérratsula ka:pé lagimang. Asindok mé:namdéméi adlang. Édé nok gíbídné adíkídí:dok yalopé ka:pa:suyéku.

       Takamlo:pé poyirné longé aséngém bidung. Siloké ainé longéso gíné 2020dítagdok 5th September do JILI: lusarsé lenbugdanna lenka. Takam Mising réngamém asin ara:bokki asé:dung. Sémmí:pé lo:dísém aya:bilang émna kumpa:dung. Sa aipé 

Nébíng kumsu

Debanondo Pe:gu,Ru:tum nébíng 

Gulap Bori, nébíng