history_edu
Poetry
Mé:tom
UIYÉ OKOLO DU:N
Khogen Pegu
Uiyé okolo du:n?
Ngolu ka:pa:mang,
Émpige:la taniyé pésodag
Bulu kídag ui do:yíngém
Odokké bulu ludag uiyé dung émna
Adí adílo angu angupé
Okolai do:nyi longélo di:nam amíd sa:la
Ísíng amíng émun-yémílo
Bulu ludag
Édé uiyé émna.
Ngolu kindag,
Tani:lokké pésoko dung
Mé:lomsunamko
Okolai aríg ara:lo
Sí:tungko mo:té:pé ka:pa:suyégom
Buluk asindo mé:mo a:dag.
Asin pésonam kokki bulu
Sí:tu:démsin
Sumyé-situmpé ka:dag
Koin bag bagdopé.
Ko:kang kinsuma:dagdo kabyémílo
Yummayir serak dorkolo
Yalo Míjíngké agom kokki
Ngolum lulomdungngai
Sí:sa:l gídagdo ngolu tatkítagai
Yéru: Bortak do:yíngém,
Tani: kamangko yumra: pa:ta:do
Longé-yumépé
Jo:gé ésab érnamém ka:la
Taniyé yalo gínamém.
Yummayirro a:né kekonké
Bottan ké:né amí:do
Épomé dumdum manna
So:mandaggai émdag
Odokké mímbír kílí:dé
Donam ídagai í:r pongkírpé
Tung tung tang tang,
Tung tung tang tang émna.
Longngém do:nyi ka:nam kokki
Okum lamkuk ía sí:lu:dé gula
Yummém ansí:dokkom
Ía kílí:dé pod pod émna bugdagai.
Odokké yumé yora:lo
Mímbír gíddom
E:gébulu lomgésula soí-menjégé
Duktaksudadagi.
Yumé lambélo méyongésin
Lígémpé duglomdagai.
Ngolu luyénéi
Édébulu uiyé émna?
Odokké Silí:siko kérangké mí:tan tajígdo
Uiyé dung émna
Kapila émmumpésin pésoyén?
Édébulu aíké ka:lomé.
Aro agom lumílo,
Asin kokki angké: pítanédé
De:gém kumgo:pénam
Okko du:n?
Taniyé taniyém néma:mílo
Mo:píso pésopénam
Okkosin kamang.
Ngo édémí:p ila léko léko
Aipé yírrí:dag.
Ai se:konu uiyém kangkítang
Édébulu émmumé. +++