Osunamdé bí:rík katoma amidé aopikang

Aídé ga:ta-ga:masula dola:-tí:la sé:kai íngkaiko leke: sutkanla aimang émna lula:ma:dopé porog,péjab,e:g,so:bo,soben attém kola, bojeko aríg amongé kamang émdogom édítkoi bíkké kadu:néji édébulum dítag  dítaklo suk-sungkeném aipé modup-monula amdang arígém ila aíké dopénam démyang bojeyangko pa:la, bojeya:nédém kopakge:la murkongém lédu lamkuké léga:pé mésí:la mékumsudungai. Kapé émyémílo bíkké aíké émpé sé mo:píso ao akkong ko, amin Konjar . Milo:dé lékoném Barot-Pakistan ajéng jé:mínsudolo Barot amongém rotpé mane aima:n tani:ém abbuk lang grenaitlok abka: bangka:mínsul du:dolo sungkenlok rokubla bík pokangardok abbuk guli:yé déngkur bomla turkípé mé:la matsang kangkup madogom lékoda matsa:la:tokumang, sikí-sipakla do:dolom aima:n tani: angngoko bík kérangardo gípíng ge:la beyenot lok níkkepé madolo bol bodapé aídé araipé ngasar suge:la grenaitko ki:dor lígge:la bulum gom bím ugné émmí:do ugbombosula “Bomyerung Barot Ané” émna jé:tomgel  bí katomang sé mo:písokké.Bí dépé ila aíké ané amo:sém ammé rodnamlok motumnam légangé bím “Porom Bir Sokro Somman” amaném bík aminém toyumla né:dém  bojerungko ayangém tolígla luyum bika. Bík Moimangém aíké ukum gílenko lakbígarpé namgor anínardo modumsula mona lé:tung,isor kumté:la bímgom aginpé kumna:dope émna mé:la.

Atér anédé abupé léko anépé léko kekon kesakpé berkup berrapla bík atér ao Konjarké légangé pí:ram attung atí atí ngasodém ka:síbomdungai, bí mé:dungai abu kamanggom kama:nammém mé:beksuma:yepé.Dépibomnammé opané kapé idakji bí kinsoitoma,sí:sanamém opan írangí:lo sí:sadogom bík gélod-bomlod,dolod-tí:lod,gílod-yelod,asin mé:lod atí takamdéi mirém ami kísa ikang. Édém ka:la anédé léko léko atér térkolo édé doying kídar déméi méngkub-mé:labla du:dungai. Bí aídé mirém la:madogom aíé dosu-tí:suna:dopé du:la:nam agomdém méngkítsula mé:la angu ami ajon arom lédulo do:ying-do:moko kímanna du:mílo ayiré émmímpé gípakpéké émna mé:dungai.Dépila ajon aromé:gom bíkké bojeko kamangai. 

Konjarbí ajjaodo lékoném anédok lakke alagdok oi lekedém sogabla biskut akunko bomnamdé oletla amo:do ojersukang,édém ka:la ingkolokkéi ko ako duga:mínla tísa:la kénongé oksib gaglíksunamkokki dolík sudanpé maddom, “Dakpo:to édém doma:langka”,kíng-gí:pé jé:danna Tu:noibí lutumto. Sí:líksupé émna i:sor bitlíksudanna dopébo émna mé:la tísa:nam biskutdém dopa:ma:la ko:dé mé:dírra tunggítla miksi dílíksul du:namdém ka:mit la:ma:la bí  dugdanna dukanko:lok biskut akunko langge:la “sé naré:nésim doto ojetsunédém doma:péka.”Ko:dé oríksudanna biskut akundém bíkké alag dok toríksuge:la polu dokampé dopakto. Édé longédokkéi édé ko:dé bím aíkémpé mé:bomsukang,tolo-bolo gílen gíayemílo gímíndungai. Bík asinlo anédém lékoda pa:ten tokunémpé mé:sukang.

Konjarbí  agerko matapé mé:la ukumlok gílennam silo dítak tanngo tangke: kopé ika:bo. Atí ainam aimangkosin tatpa ma:namki anédé bík aipé mé:nam ti:né ngamnékké agoli ékkamlo kangano:pé kun-ge:la géru-bomru suge:la aodé gílendí ayirdo lubinam du:téngdo:pé ba:slokki dukpíng ge:la tadgo tadgo:la dadapé aodok amin kanéko:lo ítu:la ngesa:la ka:sabegnam bottége:l oudné okumko:lo gíapé matoném sikuriti gard dé “íngkolok kangkiné é:joko sa:rké amin minla bík ané émna  síksula gíangka:n”, nappang arangí:do bí lusu lumusuge:la é:jodém níngkud-ní:ladbomla dungkang. Urrad namdém tatpa:la kapika:n émna Konjarbí duglenna ka:toném bík anédé po:pékémyang é:joya:la kangkinéila:ma,dadapé kangkinto. Anédé aodém lékoloi kang-gapla amin minla goktoném “nom ngo kangkinéima íngkolokkén no ?” bí lomdanna lulatsuto. Anédé ogo bing-go:la ajjaodok appíng agom odok gílendído bottén ukumlo bím  du:boye émna lula gínam agomém lutémbitoku, dépidogom aodé kangkin ma:némpé anédok luyuksupé mato. Aodé mirém oméko pa:la aídé atí agerkogom germa:pé mirémém ka:bola gor jongaipé dung,bíkké se:kosin aíké kama émna yatsuge:la. 

Mo:télokké erkub erlab mínsunam dém ka:la sí:sang ya:me:ko dukpí:la luto "ka:so ,nolu kapinamki bím dépé mojír momardu:n ?!" Tomi:la ka:namé bík dobeg-tí:beg ma:dom dotursuboné ané Tu:noibí:son. Migyabkosin du:rasula:toma anédé Nampalmé ígbílíkpé ka:pa:sula "Nampal" émna luge:la amo:do tedangkang."É na:n ngo:na nok Nampalbí" ,lomuksul lurík suge:la anédém luyumla buropto odok Konjarmé kepela ka:la luto,"No oné anémé silo séddín longésok do:nyi pía:n adíso kapé kangkinma:némpé éyyuk sudu:n, ma nok amigéi aitoma:n ? No mirém oméko pa:la gor jongai déméi bottépé mé:suka:n, aíké anémé:sin kangkin ge:la kangkin ma:né mikjemné so:yu démpin noksangém idu:n". "Kaje na:na yaméngé bélé ukumbé toya:la du:pé tokbosulangkui lomto sa,sépiné tani: lédulo du:beg ma:namdeí aiya:yépé,ngo méngkinbidung no mé:mitsula:ma:pé idung oju:sunam atér aodok do:sogdém." Komjarmé jírrí:la suttomla luto,"na:nké ayangém mé:la:pak nom déddín bottén togé-agerko bipé émna lutagay,su:pak nok aima:n séudokki bima:bo  émna ngo mé:séksutobo, sormon miksi dílíksula ngokkolo:pé lékoda gíama:péka aiyo:pé lutéldung, nok soyyém  lékoda kangge:ma:bo".

Anédé akondém léko akoné:lém léko tungé tungkurra ka:migel mé:sukang aki: kilíksul,angkir bitla oge:la,Do:nyilo gílenmílo  ambadpéké,pédongé okatmílo yebu sagré ipéké,íngkok bimíl aiya:pé doyen dépé mé:la usa:namdé íngkola:kun silo.Ésaréi saryud  tonéya,sé:kai mopan tonéya, mé:píla:tomang,le:ne miksi annyiko amik annyido gulíksul dítélsukang. Méngkinné Nampalbí:pak aro awé mé:tí mé:tíla dakorém kormínkang bík kortí:lo.....,.

_o⁰o_