history_edu
Poetry
Mé:tom
DÍIKÉ LUTAD
Rajiv Mili,
29/12/2025
Lí:jígné do:nyibí longéké tarungém
Ba:subla po:lomé gogdung.
Díidog yumdé:do ya:yobí méyabdém
Yapsula karédo kérdung…
Sermi:é pe:mígnam amírdém oksula
Ya:yobi kouwomé madung.
Pamkenam adíndog íidém nambegla
Tamidbí ngardanna dé:dung…
Kouwoké dumíddém ya:yobí rima:nna
Méyabdém yabbila dung.
Aya:ma:n tamidbí kouwoké gordu:dog
Lígémpé íidém mu:dung…
Yakasi:ké do:nyingki pétukari tu:yuddém
Agom gamig kebdung.
Donguli démporgel aín tíné ta:tobí
Nangor a:yéko romdung…
Binutké Pipoli Pa:noiké Jongkibí
Ayang mimagém moto.
Édémí mé:pa:la Bhoroli na:noibí
Dérkambe kabanko kapto…
Médog ta:tobí ya:yomé goksula
Dírbí dírlabém kepto.
Abu Pa:dunbí leke ni:tom jé:yarém
A:bang tu:lido dunto…
Dísang ao Sondro bí Torabotim jonsula
Gumrag so:manko so:to.
Pa:me ga:m ka:kí bí Taíd magbom bíbomna
Obonori abe:ko tomto…
Amín oyí:do ngosandém lígge:la na:nbí
Apiné émna jé:dung.
Amírdo kouwomé pe:reki bílíksul
Ya:yobí mélu:pé gídung