Miksi Pétum

Kapila sémpé ikan. Mé:la méngabé katomang. Yummém yummiyé katokumang . Okum bomnam dola du:tagai. Supak bomsedé katokumang yummiyé a:tokumang. 

           Ménnyíng konnyíngké do:nyíngko.   Rowwé rokompé ngok yamné yakasibí durobdanna donam tí:namém mola dobodungai. Longékoném omé jaryum mélang  Awo jarsang mé pokolo:pé mélíg ge:la isíng nakapé gíto.  Édé longédo ao-omédém Apin bikunam léga:pé lomgamna gíkupé émna méngkolo lamtédo sisangém lépa:sula lésud sudo. 

             Aipé iyyé bidla gílang kuma:pé iddom bík yígo mudborbí kayíg sudak . Dékkila mudborbí kayígla taudak kapé  sémpé ikan ma:mo  Durop-tok  sé saikel so sa:toka. Yakasi:bí ludak sangge:mang yígga amme aima:pé ka:péké. Yígodok gokksutínam kokki yakasi:bí sa:míndoku. Edé ayirdo ngo ager gerla gídokuwém ka:beksuto. Ngok ajon tupsubí lukang atay nok né:ngélé kapé sémpé nok ka:de ka:depé nok bírodo sa:míndakkun. Ngo:dan mé:modak ataya nok yamnélém. 

                  Ngok atay tupsubí édempé ngom dekko luwurém  luto. Ngo okum-pé gípíng ge:kula longédok do:nyíng kékkí yumédém aipé pamín momínsuto. Édé do:nyí dékki  kérang kétag opeyé ngok yamné yakasi-mé aipé lujarnato. Ngok yamné yaksi:bí mé:dírém aipé mé:to ngo édé ayirdo kangkin tomang. Édémpé po:lokopé yakasi:bí migmom léngkan sula:ma:la du:to.  

               Longékoném Ngo okumdo kamangai dokké omé awodé pokapé émna gíkud sudandag lédupé Yakasi:bí okke sula mo:písém mépagla gíkangku. Édé longédokké ngok turnamsé miksí pétumpé ipak-kang. Ngok mé:murnamki silo ngo sagí gítéré katomang. 

Amin : Mg Padmeswar Mili 

Do:lung : Raisapori Dolopa

Do:jíg okum: Jamuguri Panchali 

Mo:rum : Dhemaji