AGOM NGASOD
Sameswar Médok
Ngoluké Aya:bomsunam ané agomsémyang lupoya:né, tatpoya:né, atpoya:né kamang émna ngo mé:dag. Tatpoi tadané, ngamna:mé- ti:namé, okolo:sin, sékkélo:sin lubosugumang. Ba:bubí rokompé nangol gurtag émna je:rébbomnamdokké yo:bí okum bomkolo aglíng sa:la jenggo:sula ge:namlo:pé; oi-ni:tom kabnané, kaban kabnané, gomlab adnané, mé:tom adnané agomsemyang aiya:né okolo dun?
Émpigel yo:ké luyirnam agomsé su airupé ngasodé a:dunémpé andung. Su mo:téng, arang ara:lok du:né Mising do:lulo:pak naréngo:pé néríng agom, lékíng agomém lugabbomla dung.Émpila bulum appíngé oa:la kumpé lagido. Su “globalisation” adíso
ngolu ajji-botta, miné-míjing, ko-konéng, kinné-kinmangé aso: aso:pé akke gombugém mikpandu:némpé andag.Lu:jar anínlo du:né kídíngé ami agomlok luya:dag. Dok lega:pé ngolu aíém inka:sula ansunané adí a:dung. Okom mimong ara:so du:langéisong ngolu gomyar ako luyem démam adyem éddíko akon akon agom gompir lutédun, mipag, Ingraji, Hindi gombug lutédon ékémam attèdon édém anka:sula ka:nané ayir a:dung.( Ngoluké agomlok gomnu kamanamdém narnamdé angué, édémbulu la:térupa:ye.). Tukku pigapsula tatsukítoka, se:ko na:nké agomo:lok agom ludun dok addun.
Opín ako turpé odok réngam ako ami kera:lo léngkansupé aíeké dírbí dok gombug,agomlokpag léngkansula:do. Ngoluké dírbí, agom-gomug angudo émna ammem léngkanbido.
Menggabla lugabbomma:mílo, adgabbommamílo aso: aso:pé ngoluké agomém ngolukemyang aiya:né agomé dopagbomdo, édémpé aíké agomé yokpagdo.
Mé:popénamé ngoluké akke kinné oppe: édémbulu kinsula ané agomsok ainam, turyarnam légangé silíg-siya:la ager gerra dung. Émdaggom bulu pirnyi-pirumo: dígné kídíngé diktom aiyelang; ngolu appíngé:pak asin ola aíké agom lugappa:ye, adgappa:ye. U.N.O. lok UNESCO é ludung aso: aso:pé akke réngamlok agomé lang dírbí yogaya:yala gídung. Aiya:né ,bojeya:né agomé, dírbí metpagdung. Ansu-ka:sula adgabbomma:mílo ngoluké Mising agomésin yokpagyenémpé andung. Aiyopé adgabbommamílo nappango:kokki Lula ané agom turyaryenémpé mé:mang. Su ngolu agom agomloi mipag agom luté:dung.Aíké jubné gompir du:daggom, kaboné gombug du:daggom ami gombugém luté:dung.
Mising agom adné kídingé:sin sinyum-si:ro ami agomo:lok adya:dag. Aipé o:ríné, lukéng kané gomsar, anu-do:ying, do:míg, do:déng, mé:tomém mipag agomlok adya:dag. Se:koi kíla:kangkí:toka, ngoluké kinné, adné kidíngé lo:dém éddíko adlendoji, tubjebdoji, édé appídé Misingo:lok ada:mílo ngoluké agomsé éddiko mirémya:ji, ír-pongkírya:ji.
Sinyum si:ro “social media” ,” E-magazine” airupé amín gído, tanié aipé mé:dung, podung. Ngoluké Misingé:sin lédu mokutsula du:mang. Odok ara:do JILI: ,DOKSIRI, SIKUR débulu gigébola ané agomsém pu:po-jarbola, ír-pongkírbola dung. Airupé ainé agomé.su “digital ” ayiré, alaglo potinémyang mobail bomla podo. Édébulusin po:pé ané agomo:lok adnamém toligdungai Odok aso: aso:pé mipag, odog angu angu agomlok adnamémdin tolígddung. Édé ainésong aima:né:song réngamé mé:mila ka:to. Mipaglok gomlab “WhatsApp”gu:dé aío:ké agomlok atsudag.
Ngo:dan naréngo:pé ludo, kapila mipaglok éddíko addon èmna. Buluké de:gé kinné dung, adné dung. Aíké agomlok atto. Ngo:sin adma:tom, no:sin adma:tom se:ko adyen ? Ané agomsé kapé turyaryen ? Sukké si:san ko-konéngé:sin, poné kídíngé Mising abígéméi kangkinma, pokenmang.Se:koi ainé potinko adlenyem poka:né kama.
Ngoluké kinné kídíngé:sin MAK ara:lok gía:né kídingo:ém agomsém kinnémpé mé:dag, tolígdag. Akke agom légang airupé dígné emdaggom kébangém aipé mé:mané:sin dung. O:ripé, lukéng kadopé adjoné dung, kinné dung. Buluké adnamkoté poka:la ka:bipé lagido.
Sumesor Médok, Bissonat.
