Nok du:namdém Matído
Tuniram Médok.
Ayirém togésuné mukkangém
Ka:lang ka:la toríksudungi no
Dungké:sok gesigeyomnamdé
Ngoggíngké ase:la ri:yidnamé-
Émnangíng,
Nok du:tínamdém matído ngo.
Longkobo no-
Yuladyuné ésardo
Nengkutsuma:pé gíkangku
Rakud kudnam du:té:sém ka:la,
Gísegla nom je:tumpésin
Nok lunamdém mé:pa:toku
Ésing-yumrang ayidém pa:ma:mílo
Adípé du:lama:ye ngo.
Nok kama:namém anpa:la
Dogangé bírémné arígé:lé
Jo:rasula:ma:nam ngasodé
Gordung béggédung silo.
Pi:mugé réyampé punko
Kapsansuné A:nélé:gom
Tí:líng-kénongé pínkagdung,
Kéra:pé ko:latkuné
Mímbír angké:lok pedlenné
Oni:tomésin surngagdung.
Lékoném nok gítum-gíba:la gínamlok
Mélo:pé asi tí:lí:né mataurié:lé
Kangab la:ma:pé taniyé
Tolo: bolo:pé déggodung,
Arígé:lé ollung rébadé
Tolo: bolo:pé yudgo:tagdung.
Émdaggom,
Nok du:tínamdém matído ngo,
No kama:pé mo:jarné mo:píso
Gejigla kapé ase:la du: yen !
Sidok du:né turné turma:né
Pumsu ayangém bimínsula
Ngatur mullangém íngkolok pa:yen ?
——++——
